கலை எனத் தொடங்கித் தலை என முடியும் பாக்கள் !!!

சகோதரி ஜெயம் ராமச்சந்திரன் அவர்கள் வேண்டுகோளுக்கிணங்க.... 
கலை எனத் தொடங்கித் தலை என முடியும் பாக்கள் !!! 

கலைஞரை வாழ்த்திக் கனிவுடன் வேண்ட 
கலைமகள் நெஞ்சம் கனிவாள் ! - வலையில் 
உமிழாதே வார்த்தைகளை உள்ளன் புடனே 
தமிழனாய்த் தாழ்த்து தலை. 

கலைந்துசெலும் மேகமாய்க் காணாமற் போகும் 
தொலைவில் படுத்தும் துயர்கள் ! - நிலையாய் 
அமிழ்தி னினிய வழகு மொழியாம் 
தமிழ்தருமே ஆறு தலை. 

கலைமான் இணையொடு காதலில் கூடும் 
அலைகளில் மீன்துள்ளி யாடும் - மலையினின்றும் 
பாய்ந்துவிழும் சிற்றருவி பார்த்துமகிழ் வோடியற்கைத் 
தாய்க்குப் பணிவேன் தலை. 

சியாமளா ராஜசேகர்