நிலையாமை !

ஆட்டம் முடிந்ததும் ஆறடி மண்ணுள் அடங்கியப்பின் 
ஈட்டிய செல்வம் எதுவும் வருமோ இதையுணர்வாய் !
கோட்டை பிடிப்பினும் கூட்டைப் பிரிந்தவர் கொள்வதெது ?
பாட்டை யறிந்தால் பதப்படு முள்ளமும் பண்புடனே ! 

ஆகாவுன் காட்சி அழகு ....!!!

ஆகாவுன் காட்சி அழகு ....!!!
*****************************************
கருணை விழிகளால் காத்திடும் தாயே
மருவூ ரரசியே வாராய் ! - விருப்புடன்
பூமாலை சூட்டிட பூரித்தாய், நான்சூட்டும் 
பாமாலை யும்கேட்டுப் பார் . 1.

பார்போற்றும் அன்னையே! பாவத்தைப் போக்கிடுவாய்
கூர்விழியால் நோக்கிக் குறைகளைவாய் - தேர்மீதில்
வாகாய்ப் பவனி வரும்பரா சக்தியே !
ஆகாவுன் காட்சி அழகு . 2.

அழகே யுருவான அன்னையின் கோலக்
கழலின் தரிசனம் கண்டால் - உழலும்
மனக்கவலை தீரும், மகிழ்ச்சிப் பெருகும்
கனவும்கைக் கூடிடும் காண் . 3.

காண்பேனோ வுன்றன் கமலமலர்த் தாளினை
வீண்பொழுது போக்காமல் வேண்டுவனோ - நீண்டொலிக்கும்
கோவில் மணியாய்க் குளிர்ந்திடச் செய்வேனோ
பாவியெனைக் காப்பாய் பரிந்து . 4 .

பரிந்துநீ காவாக்கால் பார்தூற்று மம்மா
சரியென்றால் விட்டுவிடு தாயே! - உரிமையுடன்
கேட்கிறேன் அன்பினால் கெஞ்சிக் கதறுகிறேன்
ஆட்கொள்வா யென்னை அணைத்து. 5.

அணைக்குமுன் கைகளை ஆசையுடன் தொட்டுப்
பிணைத்துக்கொள் வேன்நானும் பேறாய் ! - துணையாய்
வருமுன்னை நெஞ்சத்தில் வைத்துச் சுமப்பேன்
திருமுகம் கண்டே திளைத்து . 6.

திளைக்குமென் னுள்ளமும் தேவியுனைக் கண்டு
சளைக்காமல் சந்ததமும் தாவும் !- விளையாட்டும்
ஏனம்மா? பிள்ளையெனை ஏற்பாய் பரிவுடன்
தேனமு தூட்டியெனைத் தேற்று . 7.

தேற்றும் பரிவுகண்டு தேம்பி யழுவேனே
போற்றி யடிபணிவேன் பூரிப்பில் ! - கூற்றுவன்
வந்தால் கலங்கவே மாட்டேன், முழுமனதாய்
அந்தகனு டன்செல்வேன் ஆம். 8.

ஆமம்மா! உன்னருளே ஆயுளுக்கும் போதுமுன்
நாமமே சொல்லி நலம்பெறுவேன்! - கோமதியே !
கொண்டைப்பூ வாசம் குளிர்விக்கக், கால்களிலே
தண்டையுங் கொஞ்சவந்து தாங்கு . 9.

தாங்கினாய் மேல்மருவூர் தாயே! தயாபரியே!
ஓங்கார ரூபிணியே! உத்தமியே! - பாங்குடன்
ஆடிப்பூ ரத்தில் அழகாய்ப் பவனிவரப்
பாடிடுவேன் வெண்பா படைத்து . 10.

ஒற்றை ரோஜா ....!!!

முள்ளிடையே மலர்ந்தாலும் மோகனமாய்ப் புன்னகைக்கும் 

கள்ளிருக்க வண்டீர்க்கும் காற்றினிலே அசைந்தாடும் 

கிள்ளியதைச் சூடிடவே கெஞ்சிநிற்கும் கன்னிமனம் 

கொள்ளைகொள்ளும் காதலரைக் கொஞ்சிடவே ஏங்கிநிற்கும்  !

இளஞ்சிவப்பு நிறத்தினிலே இனிதாக மொட்டவிழும் 

இளங்காலைப் பொழுதினிலே இதயத்தை வருடிவிடும் 

களங்கமிலாப் பனித்துளியைக் கனிவுடனே சுமந்திருக்கும் 

உளம்விரும்பும் மலர்களிலே ஒற்றைரோஜா மிகவழகே !

முத்துக் குமரா வருக வருக ...!!!

முதிரா யிளமை யோடே யென்றும் 

****முத்தா யொளிரும் முத்துக் குமரன் !

துதிக்கு மடியார் துயரைத் துடைக்க 

****துள்ளி குதித்தே ஓடி வருவான் !

விதியை மாற்றி விளங்க வைப்பான் 

****வீடு பேற்றை விரும்பி அருள்வான் !

கதியே நீதா னென்றா லவனும் 

****கண்ணீர்த் துடைக்கக் கடிதே வருவான் !

குருகு கொடியைக் கையி லேந்திக்

****கோல மயிலில் குளிர்ந்தே வருவான் !

உருகி யழைத்தால் உள்ள மினிக்க 

****உவகை யோடு காட்சி கொடுப்பான் !

முருகா வென்றால் முன்னே நிற்பான் 

****முடியாச் செயலை  முடித்து வைப்பான் !

விருத்தம் பாடி வெண்ணீ றணிய 

****விரைந்து வந்தே வினைகள் தீர்ப்பான் !

குறைகள் களைய குகனே வருக 

****குன்றி லமர்ந்த கோவே வருக !

மறைகள் போற்று மழகா வருக  

****வள்ளி மணாளா வருக வருக !

நிறைந்த மனத்தில் நிமலா வருக 

****நெஞ்சம் கனிந்து தயவாய் வருக !

இறைவா நீயும் இனிதே வருக 

****ஈசன் மகனே இசைந்தே வருக !

உடையாத நீர்க்குமிழி ....!!!

பந்தமுடன் உயிர்தந்து படைத்திட்ட பிரம்மனுனை 

வெந்தணலில் வேகவிட்டு வெதும்பிமனம் கரைகின்றேன் 

எந்தையுனக் கீடுசொல்ல எவருமில்லை இவ்வுலகில் 

தந்தையுனை யான்பெறவே தவமென்ன செய்தேனோ ?

உருகியோடும் மெழுகாக  உருக்குலைந்தே ஒளிதந்தாய் 

குருவாக வழிகாட்டிக் குவலயத்தில் மிளிரவைத்தாய் 

வருந்துயரை முறியடிக்க வழிமுறையும் கற்பித்தாய் 

திருக்கோயில் தனிலில்லை தெய்வம்நீ என்றுணர்ந்தேன் ! 

படிப்பித்தாய் வாழ்க்கைநெறி பக்குவமாய் அறியவைத்தாய் 

துடிதுடிக்கும் உன்னிதயம் துன்பமெனக் கென்றாலே

அடித்தாலும் அணைத்தாலும் அன்பொன்றே அதிற்கண்டேன் 

விடிவெள்ளி நீதானே வியனுலகை அடைந்தாலும்  !

குறையேதும் வைக்காமல் குலம்விளங்கச் செய்தவனே 

மறைந்தேநீ போனாலும் மறக்கத்தான் முடிந்திடுமோ  

நிறைந்திருப்பாய் உடையாத நீர்க்குமிழாய் நெஞ்சினிலே 

பிறையில்லா நாளன்று பிரியமுடன் வருவாயே ....!!!

கலங்க வேண்டாம் அன்னையே ....!!!

அன்னை யுன்றன் வேதனை 

****அறிய முடிய வில்லையே !

என்ன சொல்லித் தேற்றிட 

****எனக்கு வயது மில்லையே !

சின்னப் பிள்ளை யாயினும் 

****சிறந்தத் துணையாய் விளங்குவேன் !

உன்னை வாழும் நாள்வரை 

****உள்ளன் போடு போற்றுவேன் !

சென்ற நாளை மறந்திடு 

****செல்ல மகனை நினைத்திடு !

வென்று நானும் காட்டுவேன் 

****விடியல் பூக்கும் பொறுத்திரு !

துன்பம் விலகும் நிச்சயம் 

****துடைப்பேன் உன்றன் துயரினை !

நன்மை கூடி வந்திடும் 

****நடுக்கம் வேண்டாம் வாழ்வினில் !

வண்ண மாக மாற்றுவேன் 

****வருத்தம் வந்தால் ஓட்டுவேன் !

புண்ணாய்ப் போன மனத்தினைப் 

****புரிந்து நடப்பேன் என்றுமே !

விண்ணும் மண்ணும் போற்றிட 

****வியக்கச் செய்வேன் உண்மையாய் !

கண்ணுள் வைத்துத் தாங்குவேன் 

****கலங்க வேண்டாம் அன்னையே ! 

வளமாக வாழ்ந்திடுவோம் ....!!!

கரமிரண்டும் சேர்ந்தால்தான் பிறக்கும் சத்தம் 
****கவனத்தில் கொண்டாலே தெளியும் பித்தம் !
உரமிட்டு வளர்த்திடுவோம் உறவைப் பேணி 
****உரிமையுடன்  கரைசேர்க்கும்  பாசத் தோணி !
தரணியிலே தாயன்புக் கீடே யில்லை  
****தண்டமிழின் இனிமைக்கு முண்டோ யெல்லை   !
வரமான பண்பாட்டைக் கண்போல் காத்து 
****வளமாக வாழ்ந்திடுவோம்  மண்ணில் பூத்தே  ...!!

அழகு !

வழியும் விழியில் வடிவாய் விளங்கும் 

அழியா முதல்வி அழகு !

வழியும் விழியில் வதனம் மலர 
அழியா முதல்வி அழகு .

மதித்திடு தாய்மொழித் தமிழை ....!!!

இயலிசை யோடு நாடக மென்ற
***இன்றமிழ்  மூன்றினைப் போலே 
மயக்கிடும் வேறு மொழியெது முண்டோ
***மதித்திடு தாய்மொழித் தமிழை !
சுயத்துடன் விளங்கும் செம்மொழி தன்னைச் 
***சுத்தமாய்க் கலப்பட மின்றி 
வியத்தகு வண்ணம் தனித்தமிழ் பேசி
***விளங்கிடச் செய்திடல் நன்றே !

ஈரவிழி காயவில்லை இன்று ....!!!

அஞ்சாத சிம்மமே! ஆற்றலில் கொற்றவையே! 
நெஞ்சுள் நிறைந்தாய் நினைவுகளாய்!- எஞ்ஞான்றும் 
ஈடில்லாப் பெண்ணரசி! என்றினி காண்போம்யாம் 
வாடினோம் கண்ணீர் வடித்து. 

அங்குவிழி மூடி அமைதியாய்த் தூங்குகிறாய் 
பொங்கிவரும் கண்ணீரால் போற்றுகிறேன்! - மங்காதே 
உன்றன் புகழிவ் வுலகமும் உள்ளவரைச் 
சென்றுவா அம்மா சிறந்து. 

திரும்பாத நல்லிடந் தேடியே சென்றாய் 
செருக்கின்றி வாழ்ந்தாய்ச் சிறப்பாய்! - அரும்புமுன் 
புன்சிரிப்பும் எங்கினிப் பூக்குமோ சொல்லம்மா 
வென்றாயெ முள்ளம் விரைந்து 

இங்கென் மனமும் இளகித் தவிக்கிறதே 
வங்கக் கரையில் வனப்பாய்த் துயில்வாயோ 
மங்கையுன் சக்தி மகத்தான சக்தியம்மா 
எங்கும் நிறையும் இனிது. 

பகுத்தறிந்து பாங்குடனே பாதை வகுத்தாய் 
தகுதியுடன் நல்லாட்சி தந்தாய் - வெகுமதியாய்ப் 
பெற்றோமே யுன்னைப்! பிரிவென்றால் தாங்குமோ 
பற்றுடன் பாடினேன் பா. 

மதிக்கு மிதயத்தில் வாழ்வாய்நீ என்றும் 
எதிலுனையான் காண்பேன் இனிமேல்! -விதியால் 
பிரிந்திடினும் தாயேநற் பேறேநீ தானே 
மரித்தாலும் இம்மண்ணில் வாழ். 

வளர்த்தக் கழகத்தை மாசின்றிக் காப்போம் 
உளமார நேசிப்போம் உய்யத்!- தளர்வின்றி 
நாளு முயர்ந்திட நாமும் துணையிருப்போம் 
தோளுடனீ வோம்தோள் தொடர்ந்து. 

விதவிதமா யஞ்சலி வெண்பாவாய்ப் பூக்கும் 
முதல்வருக் கன்புடன் முத்தாய்! - இதமாய்த் 
துயிலுமம் மாவுக்குச் சூட்டுவேன் மாலை 
உயிராய் நினைப்பேன் உணர்ந்து. 

குளிர்வித்தா யம்மா கொடைவள்ளல் நீயே 
களிப்புறச் செய்தாய்க் கனிந்து !- உளியாய்ச் 
செதுக்கித் தமிழ்நாட்டைச் சீர்தூக்கி விட்ட 
புதுமைப்பெண் தொண்டினைப் போற்று . 

விண்ணிற்குச் சென்றாலும் மேதினியில் யாம்மறவோம் 
கண்ணின் மணியாய்க் கருதிடுவோம் !- பெண்களிலே 
பேரரசி! நற்புகழ் பெற்றக் கலையரசி! 
ஈரவிழி காயவில்லை இன்று .

வாழ்த்து ...!!!

செல்லாமற் போனதேன்? சேமித்து வைத்தவற்றை 
இல்லாமல் மாற்றிடவே இல்லைமனம்! - சில்லறையாய் 
ஆயிரமும் ஐநூறும் கைமாற்றி வாங்கிடினும் 
வாயிலாத் தாட்களை வாழ்த்து.

இதழகல் வெண்பா ....!!!

கண்ணேநின் கட்டழகைக் கண்டதிலே ஏங்கிநின்றேன் 
எண்ணத்தில் தித்தித்தாய் ஏந்திழையே!- தண்நிலா 
காய்கிறதே! தாரகை கண்ணடித்தே செல்கிறதே! 
தேய்ந்தேனென் ஏக்கத்தைத் தீர்.