வெண்பாத்துணர் ( தமிழ் - அமிழ்து)

 வெண்பாத்துணர் ( தமிழ் - அமிழ்து)

குறள் வெண்பா...!!

தமிழி னினிமைபோல் தாரணியி லுண்டோ

அமலம் நிறைந்த அமிழ்து .

(அமலம் - தூய்மை)

நேரிசை சிந்தியல் வெண்பா....!!!

தமிழ்மறை யொன்றே தலைசிறந்த நூலாய்த்

தமிழர் புகழ்பறை சாற்றும் - தமிழாள்

அமர்ந்துபரி மாறும் அமிழ்து.

இன்னிசை வெண்பா .....!!!

தமிழுக் கிணையே தரணியில் இல்லை

இமையவர் தாமும் இனிதே சுவைக்கும்

மமதை அழிக்கும் மருந்தாய் விளங்கும்

அமைதி மிகுந்த அமிழ்து .

அமைதி - மாட்சிமை

நேரிசை வெண்பா.....!!!

தமிழ்நதி பாயும் தமிழ்மணம் வீசும்

உமையாள் அரசாளும் ஊராம் - அமைதியாய்ச்

சங்கம் வளர்த்த தமிழாய்ப் பொழிந்திடுவாள்

அங்கயற் கண்ணி அமிழ்து.

நேரிசை பஃறொடை வெண்பா ....!!!

தமிழ்ச்சுவை போலும் தனிச்சுவை எங்கும்

தமிழரே கண்டிலர் தாயே ! - தமிழன்னாய்!

ஏற்றமென்றும் தந்தே இதயம் குளிர்விப்பாய்

போற்றி வணங்கிட பூரிப்பில் - ஊற்றாய்ப்

பெருகி உலகில் பெருமையுறச் செய்யும்

அருந்துயர் தீர்க்கும் அமிழ்து .

சியாமளா ராஜசேகர்