இசைப்பாடல்

 

இசைப்பாடல்

***************

பல்லவி

*********

உன்னையன்றி யார்தருவார் உரைப்பாய் கந்தா - என்

உள்ளமெனும் கோயிலிலே ஒளிர்வாய் கந்தா !

அனுபல்லவி

**************

நின்பதமே கதியென்று நெஞ்சுருகு மெளியேனின்

முன்வினைகள் களைந்துவிட்டு முத்தமிழால் அரவணைப்பாய்! ( உனையன்றி)

சரணம்

********

மின்னுமாறி ரண்டுகண்கள் வேலாவுன் எழில்கூட்டும்

பொன்னொளிரும் புன்னகையும் பூமுகத்திற் கருள்சேர்க்கும்

குன்றமர்ந்த குமராவுன் குருகுகொடி நலம்காக்கும்

சென்றவிட மெங்குமுன்றன் செவ்வேலே துணைநிற்கும்! ( உன்னையன்றி)

போதுமென்ற மனத்தோடு பூமியிலே வாழ்ந்திருந்தேன்

மோதுகின்ற கவலைகட்கு முடிவின்றித் தவிக்கின்றேன்

ஏதுசெய்ய வெனநீயே எனக்குரைத்தால் அகமலர்வேன்

யாதுமாக நெஞ்சத்தில் இருப்பவனும் நீதானே!

( உன்னையன்றி)

சியாமளா ராஜசேகர்