மீட்டாத வீணை !

பூரிப்பில் நெஞ்சமது புதுராகம் பாட 

***பொங்கிவரும் நினைவுகளில் புதுவெள்ளம் பாய 

பாரிலுயர் பைந்தமிழில் பாட்டெழுதிப் பாட 

***பாவைமுகம் உவகையினால் பவளமென மாற 

வாரியின்பம் பெற்றவளின் வாழ்க்கைமனம் வீச 

***வாடாத மல்லிகையாய் மனம்குளிர்ந்தே கூட 

பேரிடியும் விழுந்ததுவே பெண்ணவளின் வாழ்வில் 

***பேரிழப்பில் துடிதுடித்தாள் பேதையவள் நொந்தே !

கண்போலக் காத்திருந்தக் கணவனுயிர் போக 

***கள்ளமிலா மங்கையவள் கதறியழக் கண்டு 

விண்ணுலகும் கண்ணீரை மேதினியில் சிந்த 

***விழிநீரும் வழிந்திடவே மெல்லிடையாள் துஞ்ச 

உண்ணாமல் உறங்காமல் உருக்குலைந்து போனாள்

***உள்ளூரும் அவன்நினைவால் உள்ளமது வெந்தாள் 

திண்டாடும் அவலநிலை தேங்கியதால் நெஞ்சம் 

***தெளிவற்றுக் கிடந்தாளே தேம்பியழு தாளே !

கூட்டுக்குள் வாழ்ந்தவனைக் கூற்று,பழி வாங்க 

***கோலமயில் துவண்டாளே கூடலின்ப மின்றி 

ஆட்டுவிக்கு ஆண்டவனே அளித்திடுவாய் தீர்வை 

***அடுக்கிவரும் துன்பத்தில் அலைக்கழிக்க லாமோ  

மீட்டாத வீணையிலே மீண்டிடுமோ நாதம் 

***மீட்டலிலாப் பெண்மையதும் மெருகிழந்து போகும் 

வீட்டுக்குள் முடங்கியவள் மீண்டுவரச் செய்ய 

***மீட்டுகின்ற விரலாக வேண்டுமொரு துணையே !