வண்ணப் பாடல் ...!!

வண்ணப் பாடல்....!!!
*************************
தன்ன தான தன்ன தான
தன்ன தான தனதானா (அரையடிக்கு)

வெண்ணெய் போலும் மென்மை யோடு
வெண்மை யான வொளியோடே !
விண்ணு லாவி மின்னும் மாது
வெண்ணி லாவி னழகோடே !

கண்ணி லாடு கண்ண னோடு
கன்னி காத லுறவாலே !
கன்ன லாக வின்னும் பேசு
கம்ம லாடு செவியோடே !

வண்ணம் பாடும் பெண்ணை நாடி
மன்ன நீயும் வருவாயே !
மண்ணு லாவும் நுண்மி யாவும்
மண்ணி லோட விடுவாயே !

உண்ணும் போது மெண்ணம் யாவு
முன்னை நாளும் நினையாதோ !
உண்மை யோடு நன்மை தேட
ஒண்ணும் வாழ்வு முறைதானே !!

சியாமளா ராஜசேகர்