கள்ள மில்லாச் சிரிப்பில்
***கரைந்து போகும் இதயம் !
அள்ளு மழகில் நெஞ்சம்
***அணைத்துக் கொள்ளக் கெஞ்சும் !
வெள்ளை முல்லைப் பற்கள்
***விரிந்த இதழுள் மலரும் !
புள்ளிக் கோலம் போலே
***புன்ன கையால் பூக்கும் !
வெள்ளி நிலவு வதனம்
***வெகுளி யான உள்ளம் !
துள்ளும் கெண்டை மீன்கள்
***துடிக்கும் விழியி னுள்ளே !
கிள்ளிக் கன்னம் கொஞ்சக்
***கிலேச மெல்லாம் தீரும் !
தெள்ளு தமிழில் பேசித்
***தேனைப் பாய்ச்சும் காதில் !
பிள்ளை மொழியின் இன்பம்
***பெற்றால் தானே புரியும்
எள்ளித் தள்ள வேண்டாம்
***ஏழைச் சிறுமி என்றே !
No comments:
Post a Comment