கோடை மழையே வருவாயா
***கொதிப்பைக் கொஞ்சம் தணிப்பாயா ?
ஓடை காய்ந்து கிடக்கிறதே
***ஊறும் கிணறும் வற்றியதே !
வாடைக் காற்றை எண்ணியெண்ணி
***மனத்தில் ஏக்கம் பிறக்கிறதே !
பாடி உனையே நானழைப்பேன்
***பரிந்து குளிர்ந்து வந்துவிடு !!
வெளியில் செல்ல முடியவில்லை
***வெயிலின் கொடுமை தாளவில்லை !
களைப்பில் மேனி சோர்ந்திடுதே
***கடுப்பில் எரிச்சல் தோன்றிடுதே !
வளியும் அனலாய்ச் சுடுகிறதே
***வடியும் வியர்வைக் கரிக்கிறதே !
கிளைகள் யோகம் பயில்கிறதோ
***கீழ்மேல் அசைய மறுப்பதுமேன் ??
தாகம் நாவை வறட்டிடுதே
***தண்ணீர் குடித்தும் அடங்கலையே!
தேகம் சூட்டில் தகிக்கிறதே
***தென்றல் வரவை விழைகிறதே !
மேகம் வானில் சூழாதோ
***மின்னல் கொடியும் பூக்காதோ ?
வேக மாக நீபொழிந்தால்
***மேனி குளிர நனைவேனே !!
வருணன் விழிகள் திறவானோ
***மண்ணிற் கமுத மளிப்பானோ?
தரும மிகுந்த சென்னையிலே
***தாகந் தணிக்க வாரானோ
உருண்டு மோதி இடிமுழங்க
***உயிர்கள் பிழைக்கப் பொழிவானோ?
விரும்பி உனையே அழைக்கின்றேன்
***விருந்தாய் விரைவாய் இக்கணமே !!
சியாமளா ராஜசேகர்
No comments:
Post a Comment