Monday, June 18, 2018

தோழியர் குறும்பில் சொக்கிடும் தலைவி

தோழி 
********
என்னுயிர்த் தோழி கேளொரு சேதி 
***இனியவன் வந்தனன் வாடி !
உன்னவன் தனியாய்க் காத்திருக் கின்றான் 
***ஊருணி யருகினில் பாடி !
கன்னலைப் போலென் காதலி என்றான் 
***கண்களால் அழைக்கிறான் போடி!
சென்றவன் ஏக்கம் தணிந்திடச் செய்வாய் 
***தேன்மலர்க் கூந்தலில் சூடி !

தலைவி 
*************
மயங்குதென் நெஞ்சம் தனைமறந் ததுவும் 
***மன்னவன்  வரவினில் சிலிர்க்கும் !
தயங்கிடும் கால்கள் ஆயினும் இதயம் 
***தவிப்பதைத் துடிப்பினில் உணர்த்தும் !
கயல்விழி இரண்டும் படபட வென்றே 
***களிப்புடன் இமைகளை அடிக்கும் !
வயல்வெளி மீது  அவனுட னிணைந்து
***மகிழ்வுடன் நடமிட நினைக்கும் !

தோழி 
********
பித்தனைப் போலவன் பூஞ்செடி யுடனே 
***பிதற்றிடும் கோலமும் கண்டேன் !
கொத்திடும் நினைப்போ கொஞ்சிடும் நினைப்போ 
***குறுநகை இதழ்களில் கண்டேன் !
இத்தனைக் கேட்டும் பிரியமா னவளே 
***இன்னமும் வெட்கமோ சொல்வாய் !
அத்தையின் மகனை ஆவலாய்க் கண்டே 
***அணைத்திட அருகினில் செல்வாய் !


தலைவி 
***********
உனைவிட என்மேல் அன்பினைக் காட்ட 
***ஒருவரு மில்லையே தோழி !
நனைந்தவென் இதயம் மலர்ந்திடச் செய்தாய் 
***நன்றிகள் ஆயிரம் கோடி !
கனவினில் வந்து கைபிடித் தவனைக்
***கண்டிட வழிவகை செய்தாய்! 
மனமகிழ் வோடு வாழ்த்துகள் சொல்வேன் 
***மதிமுகத் தழகியே வாழி !!


சியாமளா ராஜசேகர் 


No comments:

Post a Comment