வண்ணமயில் மீதேறி வா !

விழிதிறந்து பார்த்தால் வினையாவும் தீரும்
எழில்வடி வேலா எனையாள்! - வழிகாட்ட
வண்ணமயில் மீதேறி வள்ளியுட னாடிவந்தால்
கண்குளிர்வே னுன்கோலம் கண்டு.

ஒத்தையில போறவளே ....!!!

ஒத்தையடிப் பாதையிலே 

***ஒத்தையில போறவளே 

பத்திரமா போய்வாடி 

***பால்நிலவு வருமுன்னே !

அத்தமவன் நானிருக்கேன் 

***அச்சத்த விரட்டிவிடு 

சத்தியமாத் துணையிருப்பேன் 

***சாகுமட்டும் உன்னுடனே !!

ஆத்தோரம் போகாதே 

***அலைவந்து முத்தமிடும் 

காத்துவந்து மேனிதொட்டுக்  

***காதலுடன் கதைபேசும் !

வாத்துகளும் நீந்திவந்து 

***வரவேற்கக் காத்திருக்கும் 

சேத்துக்குள் தாமரையும் 

***செவ்விதழால் சிரித்திடுமே !!

நாணமுடன் நீநடக்க 

***நாத்துகளும் தலையசைக்கும் 

நாணல்புல் கரையினிலே 

***நளினமுடன் நடனமிடும் !

ஆணவத்த விட்டுவிட்டு 

***அழகுமயில் ஆடிவரும் 

வீணான பயமெதற்கு 

***விரைந்துவாடி  என்குயிலே !!

பட்டெடுத்து வந்துனக்குப்

***பரிசமிட நாள்பார்ப்பேன் 

பொட்டுவச்சிப் பூமுடிச்சிப்

***புதுப்பெண்ணா உனைரசிப்பேன் !

கொட்டுமழை நாளினிலும் 

***குடையின்றி நடந்துவந்து 

கட்டிவெல்லத் தங்கமுனைக் 

***கண்குளிரக் காண்பேனே !!

பூவனமும் உனைக்கண்டால் 

***பூரிப்பில் குளிர்ந்துவிடும் 

தேவதையே உன்னன்பில்

***சிக்குண்டுத் தவிக்கின்றேன் !

தாவணியில் மயக்குறியே 

***தாகத்தைத் தூண்டுறியே

ஆவணிக்குள் தாலிகட்டி 

***ஆசையுடன் அணைப்பேனே !!

சியாமளா ராஜசேகர் 

தேங்கிய நீரால் ....!!!

வாங்கிய மனையில் மாளிகை கட்டி 

***மகிழ்வுடன் வாழ்திருந்தார் ! 

தேங்கிய நீரில் தெப்பமாய் மிதக்கச் 

***சிந்தையுங் கலங்கிவிட்டார் !

நீங்கிடு மோயிந் நிலையென அவர்தம் 

***நிம்மதி யிழந்துநின்றார் ! 

தாங்கொணாத் துயரால் தவித்தவர் மனம்தம் 

***தவற்றினை உணர்ந்ததின்றே !

மலைப்பயணம் !

மலைச்சாலை வழியெங்கும் சிற்றருவி கொட்டும் 

****மகிழுந்தில் மலைப்பயணம் மனமகிழச் செய்யும் !

அலையலையாய் மேகங்கள் உடலுரசிச் செல்லும் 

****அழகழகாய் உறைபனியும் உள்ளத்தை வெல்லும் !

குலைநடுக்கு  மேயதல பாதாள பள்ளம் 

****குண்டுகுழிச் சாலைகளில் பெருகியோடும் வெள்ளம் !

தொலைத்துவிட்டேன் என்னிதயம் இயற்கையிடம் தஞ்சம் 

****தொலைதூர மிருந்தாலும் நினைவுகளைச் சுமந்தே !!

தேவனே சொல்வாய் நீயே !!

கொட்டிய மழையா லெங்கும்
***கொசுக்கடித் தாள வில்லை !
விட்டிடு போது மென்றால்
***விண்மழை நிற்க வில்லை !
மட்டிலா இன்ப மீயும் 
***மழையினால் துன்பம் வந்தால்
திட்டிடத் தானே தோன்றும்
***தேவனே சொல்வாய் நீயே !

வரமே !

பனிமலை கண்ட பரவசத் தாலே
***பனித்திடும் விழிகளும் விரியும்!
நனியழ கோடு நிமிர்ந்தநற் கோலம்
*** நனைத்திட மனமதும் மயங்கும்!
புனிதமாய்த் தோன்றி விடியலின் ஒளியில்
***பொன்னிற மாயது மின்னச்
செனித்திடும் அமைதி அகத்தினில் நிறையச்
***சிலிர்த்திட வைத்திடும் வரமே!

உதித்தது கவிதை !

சிவந்திடும் இருண்ட வானில்  

***சித்திரம் தீட்டி னாற்போல் 

தவழ்முகில் அலைகள் மேலே 

***தகதக வென்றே பொன்னாய்க் 

கவின்மிகு கதிரோன் மின்னும் 

***காட்சியைக் கண்ட போழ்தில் 

உவகையில் உள்ளம் பூக்க 

***உதித்தது கவிதை நன்றே !!