அமுதாய்க்கவி பிறக்கும் ....!!!

மலைமேனியில் முகில்தூங்கிடும் வனப்பில்மனம் குதிக்கும் ! 
அலையாடிடும் தரங்கந்தனில் அழகாய்நுரை மிதக்கும் ! 
இலைமேல்பனி உருண்டோடிட இயலாமலுந் தவிக்கும் ! 
கலைகொஞ்சிடும் எழிற்சிற்பமும் கனிவாய்விழி திறக்கும் ! 

நதிபாய்கையில் கரைநாணலும் நனிவீசிடக் குளிரும் ! 
மதிதாரகை புடைசூழ்ந்திட வலம்வந்தது களிக்கும் ! 
புதிதாய்வளி வருடிச்செல பொலிவாயுளம் சிரிக்கும் ! 
அதியற்புதம் விழிகாண்கையில் அமுதாய்க்கவி பிறக்கும் ! 


( இது அதிகரீணி வகையிலான கலி விருத்தம் ) 

புளிமாங்கனி + புளிமாங்கனி + புளிமாங்கனி + புளிமா

ஓம் நமசிவாய ....!!!

நான்மறை போற்றும் நாயகா வாழ்க 
நால்வரும் பாடிய நாதனே வாழ்க 
நாற்கவி பேசிடும் நாதமே வாழ்க 
நாதாந்த சோதியின் நல்லொளி வாழ்க ....!!!

தேகம் சிலிர்த்திடநீ சீண்டு .....!!

ஆகாய ஓடையிலே அம்புலியும் நீந்திடும் 

வாகாக விண்மீன்கள் வட்டமிடும் - நோகாமல் 

மேகமே மூடிடு வெண்ணிலவை மையலாய்த்

தேகம் சிலிர்த்திடநீ சீண்டு  

இதமாய் வருடிடுமே ....!!!

தமிழுக்கென பணியாற்றிடும் தமிழன்பரின் படைப்பில்
அமிழ்தின்ருசி குறைந்தேவிடும் அருமைக்கவிச் சுவையில் 
சிமிழுள்திரி  ஒளிவீசிடும் சிவப்புச்சுட ரழகாய் 
இமைமூடிட விழிமுன்வரும், இதமாயொரு சுகமே !


( இது அதிகரீணி வகையிலான கலிவிருத்தம் !
  புளிமாங்கனி + புளிமாங்கனி + புளிமாங்கனி + புளிமா )

மஞ்சுள மேனியளை வாழ்த்து .....!!!

சஞ்சலம் தீர்க்கும் சமய புரத்தாளை 
நெஞ்சுருக வேண்டிடில் நிம்மதி கிட்டிடும் 
தஞ்சமடைந் தால்காப்பாள் தாய் . 

மஞ்சள் முகத்தாள் மலர்ப்பதம் பற்றிடில் 
வஞ்ச மகலும் வருந்துயர் தோற்றோடும் 
பஞ்சம் விலகும் பயந்து . 

கஞ்ச மலரால் கனிவுடன் அர்ச்சிக்க 
அஞ்சே லெனவே அபய மளித்திடும் 
மஞ்சுள மேனியளை வாழ்த்து . 


வெள்ளொத் தாழிசை 
``````````````````````````````` 
சிந்தியல் வெண்பாக்கள் மூன்று சேர்ந்து ஒரே பொருளைத் தாங்கிவரின் அதனை வெள்ளொத் தாழிசை என்பர். ஒரு கருத்தை அடியொற்றி மூன்று சிந்தியல் பாக்கள் புனைதலே வெள்ளொத் தாழிசை எனவும் கொள்ளலாம்.

வதைக்கிறாய் நெஞ்சுள் மலர்ந்து ....!!!

இலைமறைக் கன்னியோ இன்பத்தேன் ஊற்றோ

சிலையெழிற் சிற்பமோ செப்பு - தலைவி !

கதைபேசும் கண்களில் காந்தமோ கள்ளோ

வதைக்கிறாய் நெஞ்சுள் மலர்ந்து .

பேசும் விழிகள் !

மயக்கும் விழிகளோ மௌனமாய்ப்  பேச

தயவாய் இதயம் தவிக்கும் - வயலுள் 

கயலாய் மிதந்திடும் கண்ணின் மொழியில் 

வியந்து மறந்திடும் மெய் .